E-pad nav devezh hag eizh nozvezh o deus redet miliadoù a rederien war hentoù Breizh pemp departamant. Loc’het e oa ar Redadeg d’an 8 a viz Mae e Lannuon. Gant familhoù, skolioù, kevredigezhioù, embregerezhioù, strollegezhioù lec’hel eo bet prenet ha redet ar 2 226 km diwar skouer ar Korrika a vez aozet e Bro Euskadi.

E 2024 e oa bet roet deomp 15 000 euro gant ar Redadeg evit ma vo kendalc’het da embann hon enklaskoù, hol lizher-kelaouiñ hag hor podkastoù e brezhoneg koulz hag e galleg.

Kenderc’hel a ra ar Redadeg da sikour ar mediaoù lec’hel kevredigezhel. Gant « kuzul ar re fur », un aozadur dizalc’h, e vez dibabet ar rakresoù arc’hantaouet gant ar Redadeg. Ar bloaz-mañ e vo roet 20 000 euro da Vrudañ ha Skignañ. Un arload a vo krouet gant ar gevredigezh-se evit ma vo selaouet muioc’h hag aesoc’h abadennoù Radio Breizh, ur rouedad radioioù a genlabouromp gantañ evit skignañ hon enklaskoù.

Gant ar Redadeg e vo skoazellet ivez raktres KLT (dudi e brezhoneg goude ar skol : 20 000 €), Kreizenn dudi Naoned « Patati », ar stummadurioù aozet gant Joa! (10 000 €) hag ur pezh c’hoari krouet gant ar gevredigezh C’hoariva (8 000 €). An darn vrasañ eus an arc’hant a vo roet da Ziwan.

Etre 2008 ha 2023, war 942 000 € dastumet ez eo aet ouzhpenn an hanter gant ar rouedad skolioù dre soubidigezh.

Met estreget ur mod da zastum arc’hant eo ar Redadeg. Un digarez da gaout plijadur a-hed an hentad gant gouelioù, festoù-noz, kentelioù dañs ha frikoioù. Ur gouel poblek ha spered stourm gantañ. Kanaouenn ofisiel ar Redadeg, skrivet gant Nolwenn Korbell ha Plouz&Foen ar bloaz-mañ, o rentañ enor « d’an holl bobloù gwasket ha d’an dud o c’houzañv diwar harellerezh ».