Just-awalc’h e oa an 20 000 euro sañset bezañ implijet gant lobi ar c’hig evit kas ar c’hehentiñ war-raok. Emañ strollad an ekolojisted o vont d’ober ur goulenn ouzh Loïg Chesnais-Girard er c’hengor pad, dilun a zeu.
Digredus a-walc’h ar pezh a zo c’hoarvezet ! Ha diskredig eo chomet strollad an ekolojisted dimeurzh da noz o lenn war lec’hiennoù ar c’hazetennoù Ouest-France hag an Telegramme ne oa ket mui eus ar goulenn yalc’had 20 000 euro a-berzh ar gevredigezh « Les Z’homnivores », pa oa eus ar goulenn-se c’hoazh war veziant diabarzh dilennidi ar Rannvro ! Betek dimerc’her unnek eur ha kart eo chomet amsklaer an traoù.

Tennet e c’houlenn yalc’had gant al lobi neuze, met sklaer eo n’eo ket echu an afer evit kement-se, rak peadra zo d’en em soñjal war mont en-dro ar c’huzul rannvro. Anzav a ra Delphine Alexandre ez eo bet « diskuliet an afer gant dilennidi diavaez ar strollad muiañ niver ». Met hervez is-prezidantez ar Rannvro, « ez eo an darvoud-mañ just a-walc’h, ur brouenn hag a ziskouez eo yac’h ha demokratel mont en-dro ar c’huzul ».

Ha pa c’houlenner outi hag en ez eo « yac’h ha demokratel » gwelout ul lobi kreñv darbet dezhañ kaout arc’hant publik ken aes ha tra, e respont n’eo ket ken galloudus a-se ar gevredigezh « dre m’he deus komprenet e oa gwelloc’h tennañ he goulenn evit ma vefe sederoc’h an divizoù er c’hengor pad ». Dres ar pezh en deus diskleriet Rémi Cristoforetti, prezidant « Les Z’homnivores » d’an Telegramme, pa embann ez eo « o diviz dezho o-unan ».

Sebezet an ekolojisted : « deskiñ an afer-se dre ar c’hazetennoù n’eo ket reizh dija, hag ouzhpenn-se klevout ez eo intrudu ar gevredigezh ar fed dilezel e goulenn yalc’had, se zo ur mod da leuskel al lobi d’en em dennañ brav eus an afer. Ne c’heller ket chom diseblant goude-se ha tremen da draoù all »

« E miz mae e oa bet roet ur yalc’had da Spotentiel hag a labour evit lobi ar c’hig ivez, ha den ebet n’en doa klemmet diwar-se » eme ur c’huzulier rannvro. An taol-man eo bet tennet o goulenn gant « Les Z’homnivores » kerkent hag ez eus bet trouz er mediaoù. Ret eo gouzout e oa bet taget gant ar gevredigezh-se ar gazetennerien enklask, en o zouez Nicolas Legendre hag en deus resevet ar priz Albert Londres 2023 evit e levr « Silence dans les champs » hag Ines Leraud, savet ganti ar vandenn dreset « Ar bezhin glas, an istor difennet ». Tagadennoù, « n’en deus ket keuz » Remi Cristoforetti diwarno. « Estreget ar fed n’eo ket bet skrivet gwall vrav an traoù a-wechoù » a anzav prezidant Les Z’homnivores d’an Telegramme. Eus he zu e lavar Delphine Alexandre « ne oa ket moien da zegemer an tagadennoù-se e-kenver Nicolas Legendre hag e labour. Doujan ouzh ar c’helaouennerezh enklask a c’heller ober, hep bezañ a-du penn da benn gant tout ar pezh a vez embannet».

An ekolojisted a zo en sell lakaat ar gaoz war an afer-se er c’hengor pad, dilun 2 a viz kerzu. A-benn kompren penaos o deus divizet « Les Z’hominivores » dilezel o goulenn yalc’had ha goulenn ouzh Loïg Chesnais-Girard doujañ d’e bromesa graet e miz mae 2020 da lâret eo « chom hep sikour an aozadurioù ekonomikel ha na zoujont ket ouzh prinsipoù an demokratelezh, en o zouez ar frankiz kelaouiñ ».
Hag ur goulenn ouzhpenn eus o ferzh : « petra vije c’hoarvezet ma ne vije ket bet tennet o goulenn gant Les Z’homnivores o-unan ? Pouezet en dije ar Prezidant evit ma vefe votet ar yalc’had ? »