Krog e oa Alain Glon da labourat en ti-feurm familh krouet gant e dad André. A-hed ar bloavezhioù eo deuet a-benn Alain Glon da sevel ur gwir holding e-tre vroadel. Meur a embregerezh a vez kavet hiziv an deiz en AGH, evit Alain Glon Holding. Reoù zo anavezet mat a-walc’h gant an dud : ar chipsoù Bret’s, Ecofeutre (a sav pakadurioù adaozet), Tiliz hag e « mochis » skornet (un dibenn-pred graet gant riz). Hep disoñjal Socofag (paladoù d’ober tan) hag an embregerezhioù Equinoo (gouzer koad evit ar c’hezeg) ha Ferotec (gwaskell paledoù koad).

Savet eo bet an holl embregerezhioù-se diwar e impalaeriezh agro-industriel, bet astennet en ur brenañ hag adwerzhañ embregerezhioù all er bloavezhioù 1980, dreist-holl a-drugarez d’an emporzhiañ bleud diwar loened. Aet eo war vrasaat an holding p’he deus kendeuzet gant Sanders e 1998, a-raok bezañ adprenet gant strollad Sofiprotéol-Avril e 2007. Ar memes tra eo bet c’hoarvezet e penn kentañ ar bloavezhioù 2000 p’az eo bet adprenet e lazhtioù hag uzinoù treuzfurmiñ kig yar gant an embregerezh LDC.

Alies a-walc’h e vez taget politikerezh kemedel Stad Frañs gant Alain Glon. Displeget e oa bet gantañ da dTébéo e 2019 : « Rediet omp bet da werzhañ p’az int aet kuit ma breudeur abalamour ma ne oan ket kap da baeañ o lodenn ISF (tell war ar peadra) ». Padal, dek vloaz abretoc’h, e oa familh Glon e-touez ar 500 muiañ pinvidik e Frañs, hervez ar gelaouenn Challenges. E renk 233 e oa gant ur binvidigezh tost da 150 milion a euroioù.

Abalamour d’an obererezhioù arc’hant-se eo bet kavet anv Alain Glon er Panama Papers abalamour d’e eilstal Greengarth Holding SA. Un afer diskoachet gant Nicolas Legendre en e levr Silence dans les champs. Adkavet eo bet ivez anv Glon el LuxLeaks, da lâret eo dielloù a zeue eus Bro Luksembourg, anavezet mat evit he zos tailhoù izel-mat. E-touez an dokumantoù bet lennet gant Splann ! e vez gwelet n’int ket gwall sklaer obererezhioù an embregerezh Genel SA ha re Finafero.
Krouet eo bet Genel SA e Bro Luksembourg e 2013 evit prenañ « dre isskridañ, prenañ hag eskemm (…), an oberoù hag an talvoudoù-perzhiañ all, an endalc’hioù pe ar c’hredadoù (…) ». Ar pezh zo bet graet ganti en ur brenañ lodennoù an embregerezh Finafero evit 4.884.000 €.

Ispisializet e verañ an dalc’hoù e oa Finafero betek m’eo bet divodet an e 2022. Memes tra eus tu Genel SA. Hervez ar bilañsoù bet lennet gant Splann !, n’eus ket kalz a fiñvoù en embregerezh.

Liammet eo bet istor an daou embregerezh-se c’hoazh e 2020. Cheñchet eo bet hent gant Finafero en ur brenañ an embregerezh Genel SA, deuet da vezañ an Alain Glon Holding pa oa bet kaset, e miz Ebrel 2020, eus Luksembourg betek Bro Frañs. Laket e oa bet Véronique Le Bourge e penn an traoù, merc’h Alain Glon, ha daou zen all eus ar familh. Perak kement-se a fiñvoù en ur bloaz hepken ? Rak e miz Gwengolo 2020, da lâret eo un devezh a-raok e oa echu an amprest bet graet e 2013, e c’hall Jean-Yves Le Bourg amdreiñ an titloù e oberoù. Gwazh Véronique Le Bourge eo eñ, e penn an Alain Glon Holding. N’eo ket maez lezenn an doare-se d’ober : evel ma vefe restaolet an amprest eus 2013, met en ur lakaat an embregerezh Finafero da greskiñ eus 5 milion a euroioù.

« N’eus sujed ebet », hervez Véronique Le Bourge. P’hon eus savet goulennoù dezhi he deus respontet « eo Genel un embregerezh bet savet gant kenlabourerien eus norzh Europa. Cheñchet eo bet chomlec’h evit dont en-dro da Frañs p’az eo bet adprenet lodennoù ar genlabourerien-se ». Ha da geñver ar fed ma vefe bet lakaet ur chomlec’h e Luksembourg e lâr Véronique Le Bourge « n’eo ket tamm ebet un doare da c’hounit muioc’h a arc’hant », met kentoc’h « un dibab eus hon c’henlabourerien » hep reiñ hoc’h anvioù deomp.

Gant Nicolas Legendre eo bet savet goulennoù da Alain Glon e keñver ar Panama Papers. Gantañ eo bet respontet « ne ouie ket e oa » eus ar c’hont-se hag eus an embregerezh-se a-raok ma « vefe savet goulennoù dezhañ gant ar justis un nebeut bloavezhioù zo ».

N’eo ket forzh piv Alain Glon e bed sevenadurel ha politikel Breizh. Kemer a ra perzh e Klub an Tregont (evel Louis Le Duff, Yves Rocher, Vincent Bolloré…), ha bet eo e penn Ensavadur Lokarn betek 2019. Ul lobi eus pennoù bras e Breizh anavezet evit bezañ dreistfrankizour ha tost da vennozhioù Bro Rusia. Pa oa e penn an traoù eo bet Alain Glon unan eus ar re o deus kroget fiñv ar Bonnedoù Ruz a-enep d’an ekotakse e 2013.
E frazenn muiañ karet « bevañ ha labourat er vro » e c’haller kavout ivez e Traonienn ar Sent. Ur mirdi en diavaez eo al lec’h-se, gant 200 delwenn vras spontus eus sent Breizh. Krouidigezhioù a-vremañ bet arc’hantaouet gant tud hag embregerezhioù evit krouiñ ul lec’h touristel. Alain Glon a zo unan eus ar c’hwec’h mesened eus al lec’h-se graet « evit ma chomo bev talvoudegezh Breizh, sevel ur merk solut evit ar remziadoù da zont ha mont e-barzh ar Gelted dreistordinal », emezañ d’an Télégramme e miz Even 2023. E-touez an delwennoù e c’haller kavout hini Sant-Jelan, evel ar gumun e-lec’h m’emañ ti istorel an embregerezhioù Glon.

N’en deus ket bet c’hoant Alain Glon respont d’hon c’houlennoù.