« N’eo ket padus an aerborzhioù a zegemer nebeutoc’h eget 700.000 den », eme Lez ar C’hontoù en un diell nevez embannet diwar-benn an doare-se da veajiñ e Bro Frañs. E Breizh ez eus kalzig a aerborzhioù : 19 e pevar departamant Breizh velestradurel. Pemp anezho a servij da zegemer tud. An darn vrasañ a zo nijvaoù bihan : an hini bihanañ zo e Golf ar Gerveur gant 660 metrad hirder. Daou aerborzh bras a zo memes tra : hini Gwipavaz, e-kichen Brest (801.854 den o tremen e 2022) hag hini Roazhon (643.231 den o tremen e 2022).
Dre vras n’ez a ket mat ar jeu gant aerborzhioù bihan Breizh abalamour ez eus nebeutoc’h-nebeutañ a dud, re ger int ha ret eo kemer e kont cheñchamant an hin. Reoù zo, evel Lannuon, n’o deus ket ken linenn nij ebet. Dav eo neuze adsoñjal penaos beajiñ er vro. Met n’eo ket aes atav, evel ma vez diskouezet gant skouer aerborzh Kemper.
P’emañ 80 km diouzh aerborzh Brest ha da 73 km diouzh hini an Oriant, n’eus ket kalz a dud o tremen dre aerborzh Kemper. Ul linenn beaj a chom evit mont betek Pariz-Orly kinniget gant embregerezh Chalair adalek 2019, div wech bemdez eus al Lun betek ar Gwener.
Nebeutoc’h eget 15.000 den o deus implijet al linenn-se en 2022. 80.000 a veze gortozet… Ha setu ar Rannvro da lâret ne vo ket plantet arc’hant mui ganti en aerborzh-se : 3,4 M€ a arc’hant publik a vez roet bep bloaz evit ma chomfe bev, hervez Lez ar c’hontoù. « Gouzout a reomp ez a war-raok an embregerezhioù e Bro Gerne hep implijout al linenn nij da vont da Pariz », eme Loig Chenais-Girard, prezidant Rannvro Breizh.
Kambr kenwerzh hag industriezh Breizh Kornôg (Cimbo), a zo e karg eus aerborzh Kemper, he deus c’hoant e chomfe bev memes tra gant an abeg da lakaat an dud da fiñval en un doare aes e Breizh a-bezh. Abalamour ne vez ket tud a-walc’h o vont da Pariz, ez eus bet dibabet digeriñ daou hent beaj nevez evit mont da vakañsin e Kerry (Bro-Iwerzhon) ha Pau (64) etre miz Even ha miz Gwengolo. Un diviz evit klask saveteiñ an aerborzh-se a ya a e-enep d’ar pezh a vefe dav ober e-keñver an endro.
3,4 M€
Setu an arc’hant publik a vez roet bep bloaz evit ma chomfe bev aerborzh Kemper hervez Lez ar c’hontoù.
« N’eo ket efedus tamm ebet al linenn beaj Kemper-Pariz : 33 % eus plasoù karr-nij a oa bet leuniet e 2021. Koustañ a ra 648 € a arc’hant publik pep den eno. »
Harpit « Splann ! » evit lakaat da greskiñ ur media enklask dizalc’h el linenn e Breizh
« Splann ! » a zo ur gevredigezh (mod lezenn 1901) a zo he fal dezhi kas da benn enklaskoù-kazetenniñ poellek evit an dud e Breizh hag ar bed, e galleg ha brezhoneg. Embannet e vezont war hon lec’hien splann.org digoust. Keleier fresk ‘vez kaset gant hon lizher-kelaouiñ. A pep tra a-drugarez eus ar pezh ‘vez roet ganeoc’h.
Neuze ar pezh ‘vez roet ganeoc’h ’vez tu tennañ eus an tailhoù eus 66 %.
Splann !, ur media hep NA/IA ennañ
Ne vez ket graet enklaskoù gant an naouegezh artifisiel. Produet eo hon pennadoù, hon videoioù hag hon podkastoù gant kazetennerien gwir ha bev. Kit da lenn hon c'harta buhezegerzhel ha dleadel
Titouroù ‘peus da lâret ganeomp ?
Skrivet deomp : contact [@] splann.org ha displeget e vo deoc’h penaos kas teulioù deomp en un doare sur. Doareoù all da vont e darempred ganeomp.
- Article précédent: Harpit ac'hanomp en un doare digoust gant lusker enklask Lilo
- Article suivant: Gant Yara, alanit an amoniak e Liger-Atlantel