E miz Gwengolo 2022 e oa bet embannet ganeomp un enklask diwar-benn ar metanaat. Eno e c’haller lenn e c’hall bezañ dañjerus an deknologiezh-se, ma ne vez ket graet mat war he zro. Pouezusoc’h c’hoazh, diskouez a rae an enklask bet skrivet gant Julie Lallouët-Geffroy ha Raphaël Baldos penaos e teufe embregerezhioù bras a energiezh da vezañ rouaned ar maezioù. Lañset e oa bet an enklask-mañ goude saotradur an Aon. D’an 17 a viz Eost 2020 e oa bet un dra a-dreuz e metanaer Kastellin (29), bet savet gant SARL Centrage biogaz e Kastellin.
« Lakaat ar c’houstoù mont en-dro da zigreskiñ »
Krouet e oa bet an SARL-se e 2003 gant embregerzh Vol-V Biomasse a ra gant energiezhioù padus. Gwerzhet eo bet hec’h iskevread, Vol-V Biomasse, d’an embregerezh Engie e 2019 gant ar pal da « lakaat ar c’houstoù mont en-dro da zigreskiñ ».
D’ar 1añ a viz Genver 2020 eo deuet Vol-V Biomasse hag Engie Biogaz da vezañ un embregerezh hepken : Engie BiOZ. Raktresoù metanaat a vez kaset ganto e Bro Frañs.
Eizh miz war-lerc’h ez eus bet dilaosket 400 m³ a zour-hañvouez er stêr Aon, e-kichen Kastellin, gant unan eus metanaerioù Engie Bioz. E meur a gumun betek Su Penn-ar-Bed eo bet saotret an dour da evañ. 180.000 den zo chomet hep dour er c’hog e-pad pemp deiz. Rediet eo bet kumuniezh kumunioù Douarnenez ha Kraozon da reiñ « tri litrad dour e boutailhadoù d’an dud bemdez », e-pad ur prantad.
150.000 € taol-gastiz, 50.000 € anezho gant goursez
D’ar Yaou 16 a viz Du 2023 eo bet kondaonet Engie Bioz gant lez-varn Kemper. Ret e vo dezho paeañ 150.000 € taol-gastiz, 50.000 € anezho gant goursez (gant ar prokulor e oa bet goulennet 150.000 € taol-gastiz ha 75.000 € anezho gant goursez).
Pal an dalc’h kroget d’an 28 a viz Gwengolo ne oa ket gouzout hag-eñ eo fall pe mat ar metanaat dre-vras. Ar pal e oa gouzout hag-eñ e oa bet graet pep tra mat a-fet surentez gant ar re a oa e-karg eus ar metanaer, ha daoust hag-eñ eo bet savet a-dreuz. Ha just a-walc’h, ne oa ket bet savet mat ar metanaer, dañjerus e oa abaoe ar penn-kentañ. Setu ar varnerien da lâret e vije tu gwelet ar gwall-reuz o tont.
Gant Dour ha stêrioù Breizh (unan eus an 13 kevredigezh o deus taget ar metanaer dirak ar justis) e oa bet sachet evezh war ar metanaer-se adalek 2018, rak ne oa ket surentez a-walc’h tro-dro d’ar gibell e-lec’h ma vije laosket an dour-hañvouez. « Ha padal n’eo ket posupl e vefe kement a vetanaerioù er memes lec’hioù. »
Lenn hon enklask war ar metanaat
Lenn hon enklask war ar metanaat
Harpit « Splann ! » evit lakaat da greskiñ ur media enklask dizalc’h el linenn e Breizh
« Splann ! » a zo ur gevredigezh (mod lezenn 1901) a zo he fal dezhi kas da benn enklaskoù-kazetenniñ poellek evit an dud e Breizh hag ar bed, e galleg ha brezhoneg. Embannet e vezont war hon lec’hien splann.org digoust. Keleier fresk ‘vez kaset gant hon lizher-kelaouiñ. A pep tra a-drugarez eus ar pezh ‘vez roet ganeoc’h.
Neuze ar pezh ‘vez roet ganeoc’h ’vez tu tennañ eus an tailhoù eus 66 %.
Splann !, ur media hep NA/IA ennañ
Ne vez ket graet enklaskoù gant an naouegezh artifisiel. Produet eo hon pennadoù, hon videoioù hag hon podkastoù gant kazetennerien gwir ha bev. Kit da lenn hon c'harta buhezegerzhel ha dleadel
Titouroù ‘peus da lâret ganeomp ?
Skrivet deomp : contact [@] splann.org ha displeget e vo deoc’h penaos kas teulioù deomp en un doare sur. Doareoù all da vont e darempred ganeomp.
- Article précédent: Peseurt raktresoù zo war ar stern tro dro deoc'h e miz Du 2023
- Article suivant: [Kartenn nevez] Saotret eo 100 % eus stêrioù Breizh gant ar metolaklor ESA